6/6/2006
اكثر رقم بابحبه 6 , باتفاءل جدا برقم 6النهاردة 6/6/2006
سنة 86 : بابا ( لي أنا و أختي التوأم) : بطلوا دوشة , اخوكم في الثانوية العامة
سنة 96 : بابا بيقول لي : يا بنتي بالراحة على نفسك , الثانوية العامة مش معناها مذاكرة طول الوقت , كفاية كدا و خدي يوم أجازة
و لأختي : يابنتي انا نفسي احس انك في ثانوية عامة , انا مش باشوفك بتذاكري خالص
سنة 2006 : من الناحية العملية كلنا حققنا نجاح نسبي (و أختي بقى دخلها 4 أضعاف دخلي) بس هو مش موجود
مفتقداه جدا
جدا
جدا
جدا
كل حاجة طعمها مختلف خالص من غيره
3 Comments:
السلام عليكم دكتورة بلو
التفاؤل بالارقام او الحروف والايام حاجة غريبة فعلا
يعنى حضرتك بتحبى رقم 6 انا بحب رقم 3 وبحب حرف السين او اس بالانجليزى وبكره السبت جدااا
يا ترى دى ليها علاقة بالشخصية
مش عارفة
ممكن يكون لها علاقة بالشخصية فعلا
انا كمان باتفائل بحرف النون أو ان و أي حاجة تبتدي بحرف النون
بس كنت باقول يمكن عشان اول حرف من اسمي
لكن مافيش يوم محدد باحبه
فيه ايام باحبها بتتغير بتغير الظروف :))
ماجربتش موضوع التفائل بالأرقام قبل كده.. بس تقريبا بافضل ارقام زي 3 لانه بيفكرني دايما ان الدنيا مش محصورة بين حلين اتنين بس.. دايما في طريق تالت..
ورقم سبعة 7 .. بيفكرني بشكل كتاب مفتوح.. ومع دودة كتب زيي.. له معنى تاني..
اما
6/6/2006
ده يوم الحرية.. خلّصت أتقل امتحانات على قلبي.. أعتقد هابدأ اتفائل بيه..
Post a Comment
<< Home