21.2.06

فوبيا الطيور .....2



فجاة مابقاش فيه اي كلام غير عن انفلونزا الطيور
كل ما اقابل حد يسالني عن انفلونزا الطيور و حقيقة المصابين المحجوزين في قصر العيني (مافيش اصلا حد هايتحجز في القصر لان التعليمات اي ارتفاع في الحرارة يحول حميات و هناك يتم التحليل) , و كيفية الوقاية منها
لدرجة اني بدات احس اني الوحيدة اللي الموضوع مش بيمثل لها اهمية كبيرة , و الاحساس دا مضايقني جدا , عشان باحس اني اتجننت

بس ماعرفش ليه مش قادرة استشعر الخطورة في الموضوع , يمكن لاني عارفة و متاكدة ان اغلب اكلنا فيه ما يفوق انفلونزا الطيور خطورة بمراحل , زي المهرجان اللي صاحب موضوع العبارة كليمنصو و اعتبار مرورها كارثة بيئية باعتبار ان الاسبستوس مادة مسرطنة رغم ان نفس المادة غير ممنوعة في مصر اصلا و لها اكثر من مصنع , بل و ممارسات وزارة الاسكان الخاصة بانشاء شبكات المياه تشترط استخدام الاسبستوس دون غيره

و يمكن نوع من الحقد على حكومتنا التي وجدت مادة غنية شغلت الناس تماما عن اي شيء آخر , الناس نسيت العبارة و التحقيق و الفساد و الالف اللي ماتوا (مع ان كل ضحايا انفلونزا الطيور في العالم اقل من مائتين يعني ماشاء الله الفساد عندنا اقوى من اي فيروس)و الاجمل انهم نسيوا اصلا ان اغلب ما يأكلون مشبع بالاخطر من الفيروس ,لكن كله اتنسى
مادام التركيز الآن على انفلونزا الطيور فقط
يتبع

7 Comments:

At 2:50 PM, Anonymous عبدالله النديم said...

والله يا د/ بلو
انا فعلا رأيى كدة اهى حاجة تشغل الناس, المصل وكتئب الاعدام اللى عملوها وكل الحركات دى
انما المهم ان الناس مصدقة وبينى وبينك الناس برضه لاقياها فرصة يخرجوا من الملل
وينفسوا غضبهم فى حاجة والسلام
ومش انت لوحدك اللى الموضوع مش عامل عندك مشكلة انا كمان عندنا فى البيت بياكلوا فراخ كانت فى التلاجة ولا هامهم لاهموا كاكوا ولا الحكومة بطلت تحذر

 
At 11:04 PM, Blogger Mohammed Sameer said...

يا ربى

اخيرا وجدت ناس مش فارقة معاها زى حالاتى :-)

 
At 11:34 PM, Blogger bluerose said...

نديم و محمد سمير
طمنتوني على عقلي , كنت فاكرة نفسي الوحيدة اللي مش حاسة ان فيه مصيبة لما اتخضيت الحقيقة:))

نديم
انا ماظنش ان الناس عايزة تخرج من الملل , تجربة انفلونزا الطيور بعد تجربة الرسوم اكدت لي ان الناس سهل توجيهها , ممكن بمنتهى البساطة توجه كل اهتمامهم للاتجاه اللي انت عايزه و ينسوا اي حاجة تانية

 
At 7:02 AM, Anonymous Alaa said...

موضوع الخوف من تطور محتمل لفايروس شكله كده مبالغ فيه لكن مش هفتي و أقول أني فاهم أصلا

الكارثة الكبيرة اللي أقدر أحس بيها كارثة اقتصادية و غذائية بالأساس، الفايروس حسب ما أنا فاهم تفشي في الدواجن في أسيا (وباء يعني) و قتل عشرات الألاف من الفراخ لوحده، يعني حتى لو مش خايفين على البشر في خطر على الدواجن.

 
At 9:49 AM, Blogger bluerose said...

احتمال تحور الفايروس يا علاء وارد , هو الآن ينتقل للانسان من الطيور عند التعامل معها فقط , و لو تحور فسينتقل للانسان من اخر مريض زي الانفلونزا العادية و في هذه الحالة ستكون النتيجة وبائية

المشكلة الخاصة بالدواجن ليست قليلة
هو اي طائر يصاب بيتم اعدام كل الطيور المحيطة به, و حتى الآن تم اعدام 2 مليون طائر و البقية في الطريق , و بالتالي كما قلت هناك كارثة اقتصادية

 
At 4:58 PM, Anonymous Anonymous said...

دكتورة بلو! مدونة رائعة
بخصوص انفلونزا الطيور ، والله انا كمان مش فارقة
معايا بالمرة مع ان كل اللي حواليا عندهم حالة هلع فظيعة

-ماسة-

 
At 10:23 PM, Blogger bluerose said...

منوراني يا ماسة
انا كل اللي حواليا في البيت مرعوبين
في الشغل بقى الكل مش قادر يحس بالخطورة زيي تماما
عندي احساس ان فيه تعمد مبالغة في تخويف الناس

 

Post a Comment

<< Home