ضل حيطة
استيقظت مبكرة عن موعدها ,كانت تشعر منذ المساء بانها ليست على مايرام ,
قررت ان تذهب للمستشفى الحكومي قبل العمل
, "فيها ايه لو آخذ اليوم اجازة" فكرت , "كل الناس لها يوم اجازة في الاسبوع" , "الدنيا مش هاتتهد لو اتصلت بالمدام و قلت لها اني عيانة , المدام بتاعة النهاردة غير كل اللي باشتغل عندهم باقي الاسبوع طيبة جدا" , "لكن لو مارحتش هايضيع عليّ اجرة اليوم , طيب و طلبات البيت؟!!!" , توكلت على الله و نهضت لتلحق مكانا في الطابور امام الحمام الذي تشترك 4 اسر اخرى في استخدامه
قبل خروجها توقظ ابنتها "خلي بالك من اخوك , و حضري الغدا على ما ارجع" , "بس ابويا قال لي اعدي عليه النهاردة عشان عامل سبوع ابنه" ترد الابنة .... "يتحرق هو ومراته العقربة و ابنه, لما يبقى يصرف عليكي يبقى يقولك تروحي له" قالتها بغضب و خرجت , و نزلت السلم و هي تلعن طليقها
على السلم قابلت ضرتها و جارة اخرى و نزلتا معا تحكي كل من الضرتين عن المدام بتاعتها ,
و تركتهما ضرتها لتلحق بالاوتوبيس,,,
تحدثها جارتها بان ضرتها حالها افضل لانها تعمل طوال الاسبوع في منزل واحد فالعمل اخف , بينما تعمل هي في 7 منازل كل منها لم يتم تنظيفه من اسبوع,
"ايوة الشغل اخف بس فلوسه اقل" تجيب هي ثم تستطرد"الواحد في عرض كل قرش زيادة , ماتنسيش اني محتاجة اصرف على البت ولا كمان هايصرف على بنت غيره",,,,,,,,
"يعني هو بيشتغل اصلا ولا بيصرف عليك ولا على ابنه" استنكرت الجارة ..........
تجيب بسرعة " هو منى عينه ياختي يشتري محل مكوجي و يشتغل بس الايد قصيرة , وانت عارفة ان نفسه عزيزة مايقدرش يشتغل في محل غيره" ,,,
"انا مش عارفة انت ايه اللي رماك على الجوازة دي ,يعني كنت ناقصة حمل على حملك " ,,,,,,,,,,,,,
"يعني كان ينفع اشتغل و اخرج كل يوم قدام الناس و انا مطلقة , اهو بردو ضل راجل ولا ضل حيطة , و ماكانش قدامي غيره , هو كمان كان عايز يتجوز واحدة خلفت قبل كدا عشان مراته اللي مابتخلفش "
ودعت صديقتها عند باب المستشفى الحكومي و دخلت ليسالها الجالس على الباب " كشف مجاني ولا علاج باجر؟؟؟" ,,,
"لا مجاني " تجيب هي...........
"طيب روحي اقطعي تذكرة بخمسة جنيه من شباك العلاج المجاني" .........
تذهب لتجد الطابور طويل جدا , "انا كدا هاتاخر على الشغل" تفكر بقلق "طيب ماهو كدا كدا المستشفى بطلت تصرف ادوية و هايقولولي اشتريه من برة",,,,,,, تغادر المستشفى "ابقى اروح للصيدلي يديني اي حاجة ولا مش مهم خالص , حتى العيال اولى بالفلوس ".
posted by bluerose @ 9:49 PM
4 Comments:
لسه النهارده الصبح كنت بفكر
في موضوع خصخصة الخدمات اللي شغال على ودنه
بعد الاتصالات
بدأوا يفكروا في البريد
ودلؤتي الكلام خلاص على الـ السكه الحديد
مش ناقص غير الـ خدمات الطبيه
ودا شئ متوقع انه يحصل خلال الفتره القادمه خصوصا ان تركيبة البرلمان الحالي (بفرض ان البرلمان دا برلمان مش برطمان)
تركيبه يمينيه تماماسواء حكومه او اخوان
فمش فارقه تماما انه يخصصوا خدمات ولا يخلوا الشعب كله يشحت
دلؤتي في خمسه جنيه بتدفع يا بلو
وفي طابور
وفي خدمه زي الزفت
بس بكره
حيكون الشعار الرسمي هو الموت على الرصيف
لا خدمات زفت
ولا حتى 50 جنيه
اعتقد ان الوقت بأه مناسب لنشأة فكر يسار ديني بشكل من الاشكال
مش ناقص غير الخدمات الطبية؟؟؟؟؟؟؟؟؟؟
هو لما تبقى كل المستشفيات مافيهاش ادوية و لو فيها تبقى اردا الانواع و مالهاش لازمة يبقى لسة الخدمات الطبية ماتخصخصتش؟؟
بقالنا اسبوع حضرتك ماعندناش اي ادوية عشان مديرة الصيدلية ماعندهاش وقت (او مالهاش مزاج) تخلص مناقصات الادوية و العيانين كل يوم اسمعهم بيدعوا علينا
الاغرب بمناسبة التركيبة اليمينية ان حتى المستشفيات الملحقة بالمساجد قربت توصل تكاليف العلاج فيها لاسعار
المستشفيات العادية
و معاك اننا محتاجين يسار ديني
بلوز:)
اهدي شويه
انا مش قصدي
انا قصدي ان حتى الكشف على المريض يكون زي المستشفيات الخاصه
مش الادويه وملحقاتها
دا قصدي والله يا كابتن يعني
موضوع اليسار الديني ربنا يسهل فيه
بس جاي جاي
اللي خلى امريكا اللاتينيه تعملها يسار خاص بيها
حيبقى قليل علينا يعني
مانا هادية يا حاج مالك
الادوية عند المرضى في مصر اهم من الكشف لسبب بسيط ان الكشف دون امكانية الحصول على الدواء "في مفهوم المريض"لا اهمية له و لذلك ظهر كشف الصيدلي بمعنى ان المريض يشكو للصيدلي و يوصف له الدواء
اما ان الكشف بقى زي المستشفيات الخاصة فانا بدات احس انه بقى اغلى
يعني الخمسة جنيه دي تذكرة , دلوقتي 90% من مستشفيات الحكومة عاملة كل خطوة بسعر, يعني بعد المريض ما يكشف يطلع يدفع 40 جنيه تحاليل "مش موجودة في المجاني بس موجودة في علاج باجر"مع انها نفس المستشفى و هكذا
Post a Comment
<< Home